Hato phi la duh jingkyrmen???

---

Ha ka jingiaid lynti jong u briew bunsien ki don ki jingiakynduh ha ka jingim kaba sngew kut lad. Lehse ka lah ban long ka jingpang ha ka met, ha kaba ki doktor kim lah shuh ban iarap, ka lah ban long ba phi don ki jingiakynduh ha ka shongkha shongman ha kaba phim ioh khun, lane ka jingbymiasngewthuh jingmut ha ka jingiadei shitnga lane bad ki khun ki kti. Ka lah ban long ruh lehse phi dap ram dap shah ha kaba ki briew ki la byrngem ia phi, lane ka bank kala mut ban pynlehrain ia phi ban khnieh noh ia ka jingdon jong phi lane ban pynshitom ia phi katkum ka ain. Lehse ka lah ban long ruh ba phi pheil (fail) ha jingim jong phi kum u samla pule, lane kum u kpa lane kum ka kmie lane ha ka jingiadei para briew. Lane ka don ka jingpynrem hapoh jong phi namar ba phi la leh ia ka pop kaba khraw ha kaba phi sngew ba ym don ba lah ban map shuh ia phi. Hato phi la ju kren mo, “Ka bha ia nga ba ngan iap noh ban ia kaba nga im?” Hato phi la ju don mo ka jingpyrkhat ban shim noh iala ka jingim? Nga kwah ban ong ia phi, ba ka lad ka dang don na ka bynta jong phi. Wat nym sngewduh jingkyrmen, wat nym khuslai lane wat nym sngew sheptieng. Ka lynti kam pat kut na ka bynta jong phi. Dang don uwei uba lah ban iarap na ka bynta jong phi. Une u dei U Jisu kein. Khot ia u ha kane ka por ha ka jingim jongphi, un wan da shisha ban iarap ia phi. U Trai u ong, “To khot ia nga, te ngan phai ktien ia me, bad ngan pyni ruh ha me ia kei kiei kiba khraw (Jeremiah 33:3). U ong ruh, “Namar ma nga U Trai U Blei jong me ngan bat ia ka kti kamon jong me, da kaba ong ha me, Wat sheptieng; nga ngan iarap ia me (Isaiah 41:13). U Jisu u ong ruh, “Kiei kiei ki bym lah bad ki briew, ki long kiba lah bad U Blei” (Lukas 18:27). U Jisu u mon ban pynkhiah ia phi, U ong, “Nga mon ban pynkhiah ia phi” (Mathaios 8:3). U Jisu u dei u Nongpynkhiah jong phi (Isaiah 53:5), U dei ruh u Nongpyllait (Galatia 5:1). U Jisu u ong, “To wan ha nga, phi baroh kiba thait bad kiba khia ka jingkit, te ngan pynjem ia phi” (Mathaios 11:28). Ia phi ki bym ioh khun, U Trai u ong, “Uba pynlong ia kaba lyngki ba kan don la ka iing, bad ban long ka kmie kaba kmen jong ki khun. To iaroh ia U Trai” (Salm 113:9). U ong ruh, “Hakhmih nga leh ia kaei kaei kaba thymmai; mynta kan mih noh; phin ym tip ia ka? Ngan pynlong ka lynti ha ka ri khlaw kein, bad ki wah ha ka ri kynjah” (Isaiah 43:19). Lada phi sngew ba ym don shuh uba lah ban map ia phi, U Jisu u ong, “Ko khun la map noh ia me na ki pop jong me” ( Markos 2:5), “La map noh ia ki pop jong pha” (Lukas 7:48). U Jisu u wan khnang sha kane ka pyrthei tang na ka bynta jong phi, ban ioh ong ia kine ki kyntien, “La map ia phi.” Lada phi kwah ba U Jisu un pynthymmai ia ka jingim jong phi, ong ia kane ka jingduwai, “Trai nga long u/ka nongpop, map ia nga. Sait ia nga da ka snam jong Me. Jisu nga pdiang ia me ha ka dohnud jong nga kum U Nongpynim jong nga bad naduh mynta ka sngi ngan bud ia me. To iarap bad to isynei ia nga Trai. Amen.

U Trai un pynthymmai ia phi, shu ngeit beit ha ki jingkular jong U khlem jingartatien.